Te Hunga Whakaako
Ko ngā kaiwhakaako matua ko Tākuta Tā Tīmoti Kāretu, Tākuta Jeremy Tātere MacLeod, Piripi Winiata, Te Uranga Winiata. I roto i ngā tau kua waimarie te kaupapa i a: Pania Papa, Leon Te Heketū Blake, Amohia Juneea Silbery, Te Korou Whangataua, Anaha Hiini, Paraone Gloyne, Ngahuia Kopa, Ruth Smith, Mataia Keepa, Hemi Kelly me ngā kaiako o ngā kura reo o te rohe nei pēnei i a Te Haumihiata Mason, Hinerapa Rupuha, Tamati Waaka, Hollie Smith, Te Kuru o te Marama Dewes, Hona Black, Te Ama-Rere-Tai Rangihuna, Te Ara Ripeka Rangihuna, me Tiahuia Ropitini.
Ko Tīmoti te upoko tuatahi o te Wāhanga Māori o Te Whare Wānanga o Waikato, koinei te wāhi i piki ai ia hei amorangi. Ko ia hoki te Kaikōmihana tuatahi o Te Taura Whiri i te Reo Māori i te tau 1987 ki te 1999. I noho hoki hei kaiwhakahaere motuhake i Te Tari Matua o Te Kōhanga Reo. Nāna, nā rātau ko Te Wharehuia Milroy ko Pou Temara, i tū ai Te Panekiretanga. Ka uru mai a Tīmoti i roto i ngā wānanga ki te āki i ngā tauira kia eke ki ngā taumata ikeike o te reo kairangi.
Kua roa a Tākuta Tātere e ārahi ana i ngā mahi whakarauora i te reo me ngā tikanga i roto o Ngāti Kahungunu. Nāna i puta ai te rautaki reo a Ngāti Kahungunu - Kahungunu Kia Eke, ā, kua tonoa ia e ngā iwi huhua kia āwhina atu i ngā mahi whakarauora reo i te motu. He ika a Whiro nō Te Panekiretanga. Ka mutu, he mea whakangungu e Pou Temara i roto i ngā mahi tapu i Te Matapunenga. Ka ārahi a Tātere i ngā akoranga katoa mō te tikanga, tae ana ki ngā mahi tū marae me ngā mahi karakia.
He kanohi kitea a Piripi i ngā pae kaiako ki ētahi o ngā kura reo, arā, ki Te Kura Reo o Ngāti Kahungunu, Te Kura Reo o Ōtaki, Te Pīere o te Reo, me Te Kura Rōia. He ika a Whiro hoki ia nō Te Panekiretanga. Kua whai raihana whakamāori i Te Toi Reo Māori. Kua tonoa ki te hōmiromiro pukapuka reo Māori. Kua mahi hoki i roto i te waihangatanga mai o ētahi rautaki reo ā-iwi, ā-whakahaere anō hoki. Kua mōhiotia hoki mō ngā mahi i roto i te tukunga ihotanga o te reo Māori i te whānau. Ka whakaako a Piripi i te wetereo, i ētahi āhuatanga hoki o te tā te tāne tū marae, i ngā kōrero hoki e hāngai ana ki te mana motuhake me te tino rangatiratanga.
He kanohi kitea a Te Uranga i ngā pae kaiako ki ētahi o ngā kura reo, arā, ki Te Kura Reo o Ngāti Kahungunu, Te Pīere o te Reo (Pōneke), me Te Kura Rōia. He ika a Whiro hoki ia nō Te Panekiretanga. Kua whai raihana whakamāori i Te Toi Reo Māori. Kua kaha i roto i ngā kaupapa reo, ka mutu, ko tētahi wāhanga nui o āna mahi, ko ngā take o Te Tiriti o Waitangi. Kua mōhiotia hoki mō ngā mahi i roto i te tukunga ihotanga o te reo Māori i te whānau. Ka whakaako a Te Uranga i te wetereo, i ētahi āhuatanga hoki o te tā te wahine tū marae, i ngā kōrero hoki e hāngai ana ki te tukunga ihotanga o te reo.
Tākuta Tā Tīmoti Kāretu
Tākuta Jeremy Tātere MacLeod
Piripi Winiata
Te Uranga Winiata