He whare makatea a Te Pōkaitara e tū ana i roto o Ngāti Kahungunu. Huaki ai te whare i ōna tatau ki tētahi rangapū hou i ia rua tau. Ka noho te tauira i roto i te kaupapa mō te rua tau kātahi ia ka whakamātauria. Ko te whare nei, mō ngā uri o Ngāti Kahungunu (ahakoa kei hea i te motu e noho ana), mō ngā mātua rānei o ngā tamariki nō Ngāti Kahungunu, me ngā Māori e noho ana i te rohe o Ngāti Kahungunu. Ko te momo e tika ana kia uru mai, ko te tauira kua āhua pai kē te reo, ā, e pīrangi ana kia pai kē atu, ka mutu, e pīrangi ana kia nui ake te mōhio ki ngā tikanga, ki ngā mahi tū marae, ki ngā mahi karakia.

 

He mea ārahi e ētahi o ngā toa reo Māori o te rohe, ko tā te whare e whai nei, ko te whakatipu i tētahi hapori e tau ana ki te kawe i te reo kairangi, ki te tū ki runga i ngā marae o te rohe, ki te hāpai i ngā tikanga Māori i ngā wāhi katoa.

 

Ki te tukua kia uru mai ki te whare, ka tae koe ki ngā wānanga i ia marama, ā, mā te wheako hoki tō ako e ārahi i roto i ētahi o ngā kaupapa ā-iwi. Hei te putanga o te ihu, kua mōhio ake ki ngā āhuatanga o te reo Māori, ki ngā tikanga, kua kaha ake hoki te hononga ki te iwi o Ngāti Kahungunu.